መጋቢት 15/2017 (አሐዱ ሬዲዮ) በዛሬው ዕለት በአዲስ አበባ በሚገኙ ማደያዎች የተስተዋለው ረጃጅም የተሽካርካሪዎች ሰልፍ ከአቅርቦት እጥረት ጋር የተያያዘ መሆኑን የአዲስ አበባ ከተማ ንግድ ቢሮ አስታውቋል፡፡
የቢሮው የንግድ ኢንስፔክሽ እና ሬጉላቶሪ ዳይሬክቶሬት ዳይሬክተር አቶ ዮሴፍ አሰፋ ለኤኤምኤን እንደገለጹት፤ በዛሬው ዕለት በከተማዋ የተለያዩ አካባቢዎች በሚገኙ ማደያዎቸ ላይ የታየው ረጃጅም የተሽከርካሪዎች ሰልፍ መንስኤ የአቅርቦት እና የዋጋ ልዩነት በመኖሩ የተከሰተ ነው፡፡
ዋነኛው የችግሩ መንስኤ ግን የአቅርቦት አለመጣጣም የፈጠረው መሆኑን ያነሱት አቶ የሴፍ፤ ቀደም ሲል በአዲስ አበባ በሚገኙ ማደያዎች በየቀኑ 3 ሚሊየን ሊትር ነዳጅ እንደሚገኝ ተናግረዋል፡፡
ቢሮው ባደረገው ቅኝት በዛሬው ዕለት ማደያዎቹ 1 ሚሊየን 292 ሺሕ 965 ሊትር ብቻ ይዘው መገኘታቸውን ነው ያስታወቁት፡፡
በተለይም ከፍተኛ እጥረት የታየው በናፍጣ አቅርቦት መሆኑን ያነሱት ዳይሬክተሩ፤ 39 በመቶ የሚሆኑት ማደያዎች ብቻ ናፍጣ ሲኖራቸው 61 በመቶዎቹ ናፍጣ አለማግኘታቸውን አብራርተዋል፡፡
"ከቤንዚን ጋር ተያይዞ ከ80 በመቶ በላይ የሚሆኑ ማደያዎች ቤንዚን ያላቸው በመሆኑ በዚህ ረገድ እጥረት የለም" ሲሉም ተናግረዋል፡፡
ዳይሬክተር አያይዘውም፤ በማደያዎች የተስተዋለው የተሽከርካሪዎች ሰልፍ ከአቅርቦት እጥረት ጋር ተያይዞ የመጣ መሆኑን በመግለጽ ችግሩ ወደብ ላይ ያለው ነዳጅ ሲገባ በቶሎ እንደሚቀረፍ ገልጸዋል፡፡
#አሐዱ_የኢትዮጵያውያን_ድምጽ
